نیگار حمد على

ئەوان گوڵى چوار وەرزى ساڵن
لەگەڵ شەونمى خەندە دەبارێن
گشت ساتەکانى تەمەن  ناسکترین  خونچەى
باغچەن .... بەدەم  ژیان دەپشکوێن ..
ئەم گوڵانە  ..
ناوەرێن ...
ناژاکێن ..
ناهەژێن ..
بونى شنەى شادى دەێنن..
لەگەڵ
سپێدە
 ئەستیرە 
هەناسە ..هاوڕێن .. ..

دەنگى نزاو ئاوازى دڵسۆزانن....
چراى گەش و ئاوەدانى  ئەو ناوەن...
ترپە و چرپەى کانیلەى هیواکانن...
گوڵەکان..
لەگەل سەرماو سولەى زستانن
ئاشناى گەرمە تاوى هاوینن
وەرزى گەڵا ڕێزانیش
چیرۆکى وەرینیان  دەخوێنن
تا  لەجوانى بەهارێکدا
  تەواوى  وانەکان  بە سەوزایى و
گوڵالە سورە  بڵێن ..
ڕوحى ئەم گوڵانە
سپى و پاکە
 وەک بەفرى لوتکە ...
ساف ساماڵە
وەک ئاوى دەریا ...
پڕ عەشق و جوانیە
 وەک دنیاى پەپولە...
بەرز وبڵندە
وینەى باڵاى چیا ...
غەرقى سۆز  و راستیە
وەک هاژەى تافگە ...
گوڵەکان دەڵێن
داستانى گوڵە گەنمەکانین
ئەو گوڵەى بەرۆکتانین
وا  جوانى و بۆن
 لەروخسارمان بەدى دەکەن ...
ئەو گوڵانە ..
  ناخى هەڵا لەى  هۆشیاری خێزانن   ،،
بە چرۆى ئیمان   گەشە دەکەن ...
 باڵا چاکسازى  دەنەخشێنن...